حزنان انا يامه

حزنان انا يامه
تعالى ضمينى
محتاج لحضن بجد
م البرد غطينى
عشش فى جنبى الخوف
نقر عضام صدرى
والليل فى ضهر الليل
والعمر اهو بيجرى
ما شفت من بعدك

 
غير دنيا لونها سواد
تعبت من فوقى
تعبت من تحتى
مهما يزيد شوقى
انا البعاد بختى
يا دنيا ليه معانده
منى انا بتاخدى
سرقتى احبابى
فرقتى فى صحابى
شخبطتى فى كتابى
لا كان لى فيكى اوان
ولا مره كان وقتى
تعبان قوى لوحدى
يامه غراب العمر
طفى قناديلى
دقدق بايد الهون
على كل احلامى
فتفت مفاصلها
ورماها قدامى
وريح بطعم الموت
تزعقلى فى ودانى
من بعدك انتى غريب
يا مين يغنيلى
قالو الشموس بتغيب
وشمسى انا ماتت
لا يوم هتشرق يوم
مهما السنين فاتت
شدونى من بعدك
من النجوم الافات
قاسمونى فيما بينهم
لبسو حرير شعرى
وزهقوا قلعونى
اكلوا حباب عينى
وعلى جنب
ورمونى
سابونى اعيش اعمى
للتوهه ودونى
دى مطره دى يامه؟
حاسسها دى دموعك
وحدى انا يامه
ببارز الكوابيس
ولأنى مش شايف
صبحت انا خايف
وخوفى كتفنى
صبحت م المحابيس
طوق الزمان يامه
سلسلنى فى مكانى
لا عدت قادر اروح
ولا اجرى من تانى
كتل على اكتافى
اعمار بأحزانها
وامنيات خانها
وضمه بضلوعك
دى مطره دى يامه؟
حاسسها دى دموعك
سهرانه لى يامه؟
قايدالى فى شموعك؟
سامعانى بندهلك؟
نخت جمال الحظ
والضحكه والفرحه
ورميتنى انا فى صحرا
رمالها بتاكلنى
ندغتلى فى شبابى
عجزت تفتنى
لملمت فى عضامى
كفنت انا نفسى
بس الليله دى خلاص
البرد فاض بيا
محتاج انا لحضنك
تعالى دفينى
جواكى خبينى
اشتقت لرجوعك
مش مطره دى يامه
ياعمرى دى دموعك

كتب في: خمسه خواطر